Entstehungsgeschichte - obapfäizisch
Servus midanand, in bin da Gunsche und hob die Ehr eich zum vazäin, wai mia zu unsam Verein kumma san. Fia dai, dai wo’se aitz froung, wos’ma mid dem Verein bezwegga wöin, dene soche unsan edlen Grund: Mia wöin af unsan Planedn blos nu oan Sempf zuoloun, den Luise Händelmaier Sempf (vo Rengschbuach).
Wai i wois, moana de meistn Leid (bsundas d’Schdodara und d’Reigschmeggdn), dass’ma af sua Idee mid dem Verein blouss kummd, wemma an Feznrausch houd. Deswegn ligdd mia am Heazn, enck aitz di ganze Wahrheid zum vazöin.
Aganga is am Achz’gn vo da Hedi, a weidgschichdige Vawandschaft vo’mia, im Rosnhof in Landshut. Des mou so im Fraijoua 2004 gweng säi. Dou samma su beianand ghockt, wai’mas haid su machd, meine zwoa Gschwisdda, da Mario und’Kerstin und di zwoa Woiddaboum, da Tobias und’da Stefan. Und dann homma haid a’weng zum bläiln agfangt, iwa dai ewiche Diskussion af su Verwandschaftsfeian, vo wöicham Metzga dai Wiascht herhan.
Af jedan Fai hamma vo di Wiascht zum Sempf kumma. Nou homma haid gmoant, dass’da Händelmeia schou da beste Sempf is, und dass den a a jeda dahoam houd. Dou kannt’ma ja fast an Fanclub afmacha.
Dai Diskussion homma dann a in unsana Partyhiddn, da Schdum, vazöid und dai hom nou s’Schpinna agfangd. Und aso sans nou allawai meia woan, dass’ma wirggli an Fanclub afmacha kanntn.
Owa zwech’brouchd houd’des dann doch easchd da Lichtmannecker Rudi, dea oide Howaföiddreiwa, der wo’se dou am’meissdn einigschdeichad houd und vü oaganisiad houd, wos’ma haid fia sua Gründung brachdd. Und waima’se dann sua Satzung iwaleggt khod hom, is dai Gründungsversammlung kumma, dann da B’such beim Notar und dann woas suweid, dass’ma a in da Tseidung dringschdanndn han. Und a’so woama dann af oamai a e.V.
Wai iatz owa in dem Ardickl niad wiagglich raskummd, dass’ned doch a Sauraus woa söimais, mou’ne sogn, wenns oana gwen’wa, dann dade aitz a nix meia dafu wissn!
So aitz moune owa afhäian, dass’ma mei Koibslewakaas niad koid wiad.
***
Gerhard
